:پیپلز پارٹی بلوچستان کے راہنما ایم این اے نوابزادہ جمال خان رئیسانی نے کہا ہے کہ 5 جنوری صرف ایک شخصیت کی پیدائش کا دن نہیں، بلکہ ایک نظریے، ایک انقلاب اور ایک تاریخ کی ابتدا کا دن ہے، ذوالفقار علی بھٹو ایک ایسی آواز تھے جو مظلوموں کے حق میں گونجی، ایک ایسا خواب تھے جو پاکستان کو خودمختاری اور ترقی کی راہ پر لے جانے کے لیے دیکھا گیا، اور ایک ایسی تحریک تھے جو آج بھی دلوں میں زندہ ہے۔
ہفتہ کواپنے بیان میں انہوں نے کہا کہ ذوالفقار علی بھٹو نے ہمیں یہ سکھایا کہ طاقت عوام سے ہے اور قیادت صرف خدمت اور قربانی کے ذریعے ممکن ہے۔انہوں نے پاکستان کو پہلا متفقہ آئین دیا، ایٹمی پروگرام کی بنیاد رکھی، مزدوروں اور کسانوں کو ان کے حقوق دلوائے اور ملک کو ایک نئی شناخت دی۔
ان کی جدوجہد نے نہ صرف تاریخ بدلی بلکہ ایک ایسا چراغ جلایا جو کبھی نہیں بجھے گا۔نوابزادہ جمال خان رئیسانی نے کہا کہ آج کا دن ہمیں یہ عہد کرنے کی دعوت دیتا ہے کہ ہم بھٹو کے ویژن کو حقیقت میں بدلیں، اس پاکستان کو تعمیر کریں جہاں ہر شہری کو برابری، انصاف اور ترقی کے مساوی مواقع ملیں۔ آئیں، ان کے خواب کو اپنی منزل بنائیں اور اس عزم کے ساتھ آگے بڑھیں کہ پاکستان کو بھٹو کے نظریات کے مطابق ایک عظیم اور خودمختار قوم بنائیں گے۔