ڈی آئی جی کوئٹہ عمران شوکت کا محرم الحرام کے انتظامات کا جائزہ، علماء کرام سے اہم ملاقات
ڈپٹی انسپکٹر جنرل آف پولیس کوئٹہ عمران شوکت نے سفیر مسجد، پرنس روڈ میں سنی اور شیعہ مکاتبِ فکر کے علماء کرام کے ساتھ محرم الحرام کے حوالے سے ایک اہم اجلاس کی صدارت کی۔ اجلاس میں محرم الحرام کے دوران امن و امان، بین المسالک ہم آہنگی، جلوسوں اور مجالس کی سکیورٹی سمیت دیگر انتظامی امور پر تفصیلی تبادلہ خیال کیا گیا۔
ڈی آئی جی کوئٹہ نے اس موقع پر کہا کہ محرم الحرام کے دوران شہریوں کے جان و مال کے تحفظ اور پرامن ماحول کے قیام کے لیے تمام ممکنہ اقدامات بروئے کار لائے جائیں گے۔ انہوں نے علماء کرام کے تعاون کو قابلِ قدر قرار دیتے ہوئے باہمی بھائی چارے اور اتحاد کی فضا برقرار رکھنے پر زور دیا۔
بعد ازاں ڈی آئی جی عمران شوکت نے محرم الحرام کے جلوسوں کے روٹس اور مختلف امام بارگاہوں کا دورہ کیا، جہاں انہوں نے سکیورٹی انتظامات، داخلی و خارجی راستوں، نگرانی کے نظام اور دیگر ضروری اقدامات کا جائزہ لیا۔ اس موقع پر متعلقہ پولیس افسران نے انہیں سکیورٹی پلان اور انتظامات کے بارے میں بریفنگ بھی دی۔
علماء کرام نے محرم الحرام کے دوران امن و امان کے قیام کے لیے پولیس کی کاوشوں کو سراہتے ہوئے ہر ممکن تعاون کی یقین دہانی کرائی۔ ڈی آئی جی کوئٹہ نے کہا کہ تمام مکاتبِ فکر کے تعاون سے محرم الحرام کے دوران امن، رواداری اور بھائی چارے کی فضا کو یقینی بنایا جائے گا۔